Gipahibalo sa Department of Justice nga sila Curlee ug Sara Discaya, uban sa pipila ka mga kanhi opisyal sa Department of Public Works and Highways, gibutang ubos sa Witness Protection Program.
Kini ang gikompirma ni Justice Secretary Jesus Crispin ‘Boying’ Remulla, luyo sa ilang pagbisita sa ilang buhatan.
Matod niya nga gawas sa mga Discaya, kini naglakip nila ni kanhi Department of Public Works and Highways Bulacan 1st District Engineer Henry Alcantara, Brice Hernandez ug Jaypee Mendoza.
Gipaambit ni Justice Secretary Remulla nga ang nahisgutang mga indibidwal gikonsidera nga ‘protected witnesses’.
Matod niya nga nagpadala sila og sulat ngadto kang Senate President Vicente ‘Tito’ Sotto III aron pahibaw-on kini dungan sa nagpadayong imbestigasyon.
Hinuon gipasabot sa kalihim nga kining maong lakang wala magpasabot nga state witness na sila kondili aron lamang makakuha ug dugang impormasyon alang sa imbestigasyon.
Samtang kagahapong adlawa niabot sa Department of Justice si kanhi Department of Public Works and Highways assistant district engineer Brice Hernandez.
Dala niya ang iyang CPU nga gisusi sa departamento ug gikuhaan og impormasyon nga mahimong makatabang sa nagpadayong imbestigasyon.
