Maayo na ang kahimtang sa Japan human miigo ang magnitude 7.1 nga linog niadtong Hulyo 28, 2026
Sumala kang Rommel Inoncillo, Bombo International Correspondent (BIC) sa Yamamoto, Japan, bisan wala pa mabalik ang suplay sa tubig sa ilang lugar, paspas usab nga gipatuman sa gobyerno sa Japan ang relief operations alang sa mga residenteng naapektuhan sa maong kalamidad.
Gipadayag usab ni Inoncillo nga siya mismo nakasinati sa kusog nga pag-uyog tungod kay duol siya sa epicenter sa linog. Apan bisan pa niini, wala siyay nabalitaan nga Pilipino nga naapektuhan sa maong panghitabo. Matud niya, ang pinakagrabeng kadaot nakit-an sa pipila ka mga building ug uban pang imprastraktura.
Dugang pa ni Inoncillo nga nakadawat na og ayuda ang mga residente nga gibakwit ngadto sa mga evacuation center. Iyang gidayeg ang paspas nga aksyon sa gobyerno sa Japan sa paghatag og tabang ug uban pang panginahanglanon sa mga naapektuhan nga mamamayan.
