Hugot na sa mga preparasyon ang General Santos City alang sa umaabot nga Kalag-Kalag 2025 o Undas, aron masiguro ang hapsay, malinawon, ug luwas nga pagsaulog sa paghinumdom sa mga minahal nga namatay.
Sumala pa nga gipahigayon na ang mga koordinasyon sa kapulisan, traffic management, ug mga barangay officials aron mahatagan og klaro nga pamaagi sa crowd control palibot sa mga sementeryo.
Giandam na usab ang mga designated parking areas, medical stations, ug assistance desks sa dagkong pampubliko ug pribadong sementeryo sa dakbayan, lakip na ang Lagao Public Cemetery, San Carlos Memorial Park, ug Forest Lake Memorial Park.
Matud ni Mayor Lorelie Geronimo-Pacquiao, importante nga magtinabangay ang tanan aron mamahimong malinawon ug mahapsay ang pagsaulog.
Samtang, nagpahimangno ang General Santos City Police Office (GSCPO) nga hugot nilang ipatuman ang seguridad sa tanang sementeryo ug transport terminals, ug gina-awhag ang publiko nga likayan ang pagdala sa mga butang nga delikado sama sa armas, ug kaldero.
Gilauman nga liboan ka mga residente ug bisita ang motambong sa Kalag-Kalag 2025, ug nagpanghinaut ang lokal nga panggamhanan nga magpabilin ang kalinaw, kadasig, ug espiritu sa panaghiusa sa tibuok selebrasyon.
