GENSAN- Gipaklaro sa lokal nga gobyerno sa General Santos City nga dili gamiton ang nasunog nga pwesto sa ukay-ukayan sa Purok Islam, Brgy. Dadiangas South ning dakbayan isip temporary relocation site sa alang sa sobra 1,400 ka mga vendor nga maapektuhan sa redevelopment sa Central Public Market nga tawgong ‘Palengke Heneral”.
Sumala kay City Administrator Shandee Pestaño, ang nasunogan nga lugar usa ka private property, hinungdan nga dili basta-basta nga makasulod o makagamit ang gobyerno niini.
Bag-o pa man giaprobahan ang redevelopment sa Palengke Heneral, naestablisar ug na-identify na sa lokal nga gobyerno ang sakto nga relocation sites.
Base sa ilang kalkulasyon ug budget, bastante ug sakto ang giandam nga mga pwesto alang sa tanang maapektahang vendor.
Giklaro ni Pestaño nga walay labot ang Local Government Unit (LGU) sa nahitabong sunog sa ukay-ukayan.
Gihangyo usab niya ang mga nagpakatag og dili tinuod nga balita nga hunongon ang pag-ingon nga gobyerno ang nagpaluyo sa sunog.
