Gipatin-aw sa kampo ni Senator Bato Dela Rosa nga dili pa nagpasabot og paglapas sa mga lagda sa Senado ang pagdawat sa Ethics Committee sa reklamo batok kaniya.
Sa opisyal nga pahayag sa abogado sa senador nga si Atty. Israelito Torreon, iyang gipasiugda nga ang pagklasipikar sa reklamo isip “sufficient in form and substance” dili pa katumbas sa desisyon sa komite bahin sa maong kaso.
Matod ni Torreon, bahin lamang kini sa proseso aron pormal nga maipadala sa senador ang reklamo ug makasumite siya sa iyang tubag. Gikumpirma usab sa abogado nga nadawat na sa opisina ni Dela Rosa ang maong reklamo.
Gilauman usab sa ilang kampo kung mosumite ba og mga affidavit ang ubang nagreklamo.
Gipaniguro ni Torreon nga mosumite og tubag si Dela Rosa sulod sa gitakdang panahon ug mangayo sila sa Ethics Committee nga ibasura ang reklamo.
Gidugang sa abogado nga wala gibiyaan sa senador ang iyang opisina ug nagpadayon gihapon kini sa pagtrabaho bisan wala siya mismo sa Senado tungod sa iyang giatubang nga arrest warrant ug posibilidad nga mosurender sa International Criminal Court o ICC.
Matod pa niya, posibleng motungha ang senador kung dad-on sa lokal nga korte ang mga kaso o alegasyon batok kaniya.
Gireklamo si Dela Rosa sa grupong Wag Kang KuCorrupt tungod sa dugay na niyang pag-absent sa iyang opisyal nga mga katungdanan isip senador.











