Naglusad ang Russia og dinagkong pag-atake gamit ang kapin 400 ka drone ug 110 ka missile ang Ukraine, nga miresulta sa pagkamatay sa siyam ka tawo ug pagkaangol sa laing 28.
Milungtad og kapin 10 ka oras ang maong pag-atake, diin lakip sa mga naigo ang mga tulay, imprastraktura sa kuryente ug mga pinuy-anan.
Matod sa mga awtoridad sa Ukraine, lakip sa gigamit sa Russia ang 27 ka ballistic missile.
Sumala kang Ukrainian President Volodymyr Zelenskyy, gipunting usab sa mga pag-atake ang mga pasilidad nga nagsuplay og kuryente sa mga nuclear power plant ug nagdugtong sa power grid sa Ukraine ngadto sa mga silingang nasud sa European Union.
Gikondena ni Zelenskyy ang paggamit sa cluster warheads ug ang sunod-sunod nga pagpamomba nga matod niya, nagtumong sa pagpugong sa rescue operations ug pag-ayo sa mga naguba nga pasilidad.
Gikondena usab ni NATO Secretary General Mark Rutte ang maong pag-atake samtang nanawagan si Zelenskyy sa mga kaalyadong nasud nga paspason ang paghatod og air defense systems ug PAC-2 ug PAC-3 missiles.











