GENSAN- Gipalig-on sa Asia Pacific Alliance for Disaster Management o A-PAD Philippines ug sa lokal nga pangagamhanan sa General Santos City ang ilang panagtambayayong pinaagi sa pagpahigayon og Emergency Medical Simulation Exercise atol sa paglusad sa Project MedX sa SOCCSKSARGEN.
Gipahigayon ang maong kalihokan kagahapon, Nobyembre 11, 2026, sa General Santos City National High School sa Barangay Calumpang, diin miapil ang nagkadaiyang ahensya sa gobyerno ug pribadong sektor.
Lakip sa mga miapil ang City Disaster Risk Reduction and Management Office, City Health Office, Bureau of Fire Protection, Philippine Red Cross, Barangay Calumpang, Department of Education Region 12, mga ospital sa siyudad ug uban pang kaabag nga organisasyon.
Pinaagi sa maong simulation exercise, gisulayan sa mga partisipante ang ilang koordinasyon ug pagtubag sa mga emerhensiya, ilabi na sa mga insidente nga daghan ang mga biktima, aron mailhan ang mga kakulangan ug mapaayo ang ilang sistema sa pagresponde.
Tumong sa Project MedX nga mapalig-on ang kahaandam sa siyudad sa mga kalamidad, mapauswag ang kapasidad sa emergency medical response ug masiguro ang hapsay nga pagtinabangay sa nagkadaiyang ahensya aron mas daghang kinabuhi ang maluwas panahon sa emerhensiya.
