Daghan ang dili makatuo sa sunodsunod nga suwerte sa usa ka Canadian cancer survivor human siya makadaog sa lotto katulo sulod lang sa siyam ka buwan, nga mikabat sa kapin $2.5 million (mga P156 million).
Si David Serkin sa Lethbridge, Alberta, nakadaog og $1 milyon sa Lotto 6/49 Classic draw kaniadtong Mayo 3, pagkahuman sa iyang kanhing kadaugan nga $500,000 sa Lotto Max kaniadtong Agosto 20, 2024 ug laing $1 milyon sa Lotto 6/49 kaniadtong Nobyembre 16, 2024, sumala sa Western Canada Lottery Corporation (WCLC).
Giangkon ni Serkin nga gamay ra kaayo ang posibilidad nga mahitabo kini, labaw pa sa usa sa 33 milyon, apan kanunay siyang namalit og mga tiket sa loterya sukad sa 1982. Matod niya nga mopalit siya og tiket matag higayon nga mokuha siya og gasolina, ug kon dili siya swertehon, mosulay na lang siya pag-usab.
Gawas pa sa iyang bag-o nga kadaugan, nakadaog usab si Serkin og $250,000 kapin sa usa ka dekada ang milabay. Siya midugang, “Ako usa ka cancer survivor ug retirado, mao nga ako mapasalamaton kaayo alang niining tanan.”
Bisan pa sa iyang sunodsunod nga kadaugan, si Serkin nagpabilin nga mapaubsanon, nga nag-ingon “tingali dili na kini mahitabo pag-usab,” apan malipayon siya nga nagpadayon sa pagsulay sa iyang suwerte.
