Dako ang pagmahay sa usa ka lalaki sa Michigan, USA, nga mitambong sa iyang kaso pinaagi sa Zoom samtang nagmaneho tungod kay nasuspenso ang iyang driver’s license.
Daling nabantayan ni Judge Cedric Simpson ang akusado nga si Corey Harris sulod sa sakyanan maong nangutana siya kon nagmaneho ba kini.
Ingon man nga wala gikalimod ni Harris ug miangkon nga nagmaneho kini ug depensa nga paingon kini sa doctor.
Wala dayon makatuo ang huwes sa maong panghitabo hinungdan nga iyang gipangutana ang usa ka partisipante kung sakto ba nga ang kaso nga iyang gidungog mao ang kaso ni Harris nga may kalabotan sa iyang suspenso nga driver’s license.
Nasayran nga temporaryong nakagawas si Harris tungod sa piyansa ug miinsister unta ang iyang abogado nga i-postpone og laing upat ka semana ang pagdungog sa iyang kaso.
Apan tungod sa nakita ni Judge Simpson, iyang gikanselar ang piyansa ni Harris ug gimandoan nga moadto sa kapolisan aron mapriso.
Igo nalang nga naka-“Oh my God!” si Harris sa hukom sa huwes.
