GENSAN – Nagpahigayon ang General Santos City Police Office ilawom sa liderato ni PCol. Nicomedes Olaivar Jr. City Director, pinaagi ni LTCol. Aldrin M. Gonzales, Deputy City Director for Operations, og Simulation Exercise kon SIMEX palibot sa Pioneer Avenue nga maoy sentro sa mga aktibidad sa Kalilangan 2026 kauban ang Explosive Ordnance Disposal (EOD) Unit.
Tumong niini nga masiguro ang ‘operational preparedness’, masusi ang kapabilidad sa pagresponde og masiguro ang paspas og epektibong implementasyon sa mga protocols sa pagpatuman sa seguridad kung matigayon ang ala damha nga mga insidente atol sa katibuk-ang selebrasyon.
Ang simulation tumong nga mapakusog ang ‘inter-unit coordination’ og mapaayo pa ang kaandam sa mga police personnel nga madeploy aron masiguro ang seguridad sa venue labaw na sa mga katawhan.
Atol sa gipahigayon sa syudad nga press conference sa usa ka mall sa dakbayan, anaa ang presensya ni City Director Olaivar kung asa gipasalig ang kaandam sa mga kapulisan sa usa ka semana nga Kalilangan nga magsugod sa Pebrero 23 og matapos sa Pebrero 27.
