GENERAL SANTOS CITY – Nagpahugot sa seguridad ang kapulisan sa syudad gumikan sa nagkaduol nga pagtapos sa kagubot didto sa Marawi City.
Kabahin kini sa preparasyon sa mga otoridad sa pagpahugot sa seguredad sa posebling pagpahigayon ug panimalos ang mga teroristang grupo human namatay didto sa Marawi ang Abu Sayyaf leader ug Emir sa ISIS sa Asya nga si Isnilon Hapilon ug Omar Maute lakip na kang Dr. Mahmud Ahmad sa operasyon sa militar.
Gawas sa mga check points, pagpakatag sa mga naka motor nga sakop sa kapulisan, pagpatuman ug pagsusi sa mga pasahero sa mga pamasaherong bus ug van aron masiguro nga dili makalusot ang mga dautang elemento.
Gawas niini, adunay tropa ang kapulisan nga gibutang sa mga terminal ug uban pang pampubliko nga dapit.
Samtang panawagan sa otoridad ngadto sa publiko nga gilayon nga itaho ngadto kanila ang mga kadudahang lihok u butang nga makita sa ilang lugar.
