GENERAL SANTOS CITY – Kapin sa P2 million nga kantidad sa gikaingon nga illegal nga droga ang nakumpiska sa anti-illegal drug entrapment operation Purok Mudia, Barangay Labangal ning dakbayan nga nagresulta sa pagpasikop sa lima ka mga indibidwal.
Base sa report sa Makar Police Station giila ang mga nasikop nga silang Norodin Camsa, 56-anyos, minyo mag-uuma ug Nash Tinagayao, 27-anyos, minyo, construction worker mga residente sa nasampit nga barangay.
Lakip nga nasikop ang nagpangalan Mike Acas, 38-anyos, motorcycle mechanic nga residente sa Purok 7, Phase 1, Lanton, Barangay Apopong ning syudad; lakip ang nagpangalan Samer Sumalinog, 23-anyos construction worker sama nga residente sa nahisgutan nga lugar ug nagpangalan Joseph Mabang, 21-anyos nga nanimuyo sa Zone 1, Purok Mudia sakop sa Barangay Labangal.
Nasayran nga nakuha gikan sa mga suspek ang ubay-ubay ka mga pakete sa gikaingon nga shabu nga gibanabanaan anaa sa 350 gramos nga nagkantidad sa P2, 108, 000.
Sa kasamtangan balhog na ang mga suspek sa nasampit nga Police Station nga nakatakda nga pasakaan og kasong pagsupak sa RA 9165 kon Comprehensive Dangerous Drugs Act of 2002.
