Dead on arrival sa ospital ang 15-anyos nga dalagita human mabanggaan ang iyang gimanehong motorsiklo sa kasugat nga mini-van kagahapon, alas 10:30 sa buntag, sa national highway sa Barangay Lipata, Surigao City.
Ang biktima giila nga si Jennelyn Mibulos Sabornido. Ang iyang angkas mao si Lea Mebulos Sabornido, 24-anyos, kinsa padayon pang giatiman sa ospital tungod sa mga samad nga iyang naangkon.
Nasayran nga motabok unta ang motorsiklo sa mga biktima dihang kalit silang nabanggaan sa mini-van nga gimaneho ni Nemeul Laput Maratas, 48-anyos, residente sa Purok 1, Barangay San Isidro, Tubod, Surigao del Norte.
Tungod sa kusog nga impact, nilagpot ang duha ka biktima nga miresulta sa grabeng samad ug mga bun-og sa ilang lawas.
Sa pagkakaron, gikustodiya na sa Surigao City Police Station ang driver sa mini-van ug giandam na ang kasong reckless imprudence resulting in homicide ug physical injury.
