Nagpadayon ang retrieval operation sa mga rescuers sa usa ka tunnel sa Purok 5, Brgy. Upper Licanan, Panabo City human matrap ang lima ka giingong treasure hunters.
Walay pagpanuko nga misulod ang mga rescuer sa lawom ug delikadong lungag aron pangitaon ang mga biktima.
Sumala sa report sa LGU Panabo, duha na ka lawas ang narekober nga si Rodolfo Maputol, 59 anyos, taga-Tagum City nga nakuha kaniadtong Abril 23, 2026 ug si Patriarca Pepe, 59 anyos nga narekober usab kagahapon Abril 24,2026 sa udto.
Gitouhang anaa pa sa sulod sa tunnel ang tulo pa ka biktima nga giila nga sila Mario Quinoquito, 39 anyos, taga-Purok 4, Brgy. Maduao, Panabo City; Sucias Late, 75 anyos, taga-Agusan del Sur; ug Wilson Bardago, 63 anyos.
Sumala sa Panabo City Fire Station, sila ang unang naglunsad og search and rescue operation nga karon gihimong retrieval operation, kauban ang Bureau of Fire Protection Special Rescue Force gikan sa Davao del Norte ug Davao City Fire District, City Disaster Risk Reduction and Management Office, Philippine National Police Panabo, EOD Davao del Norte, ug 27th Infantry Battalion sa Philippine Army.
Padayon gihapon ang imbestigasyon sa mga otoridad aron mahibal-an ang eksaktong hinungdan sa pagkahugma sa bangag nga gikalotan sa grupo samtang nagbuhat og treasure hunting activity.
