GENSAN- Miabot na sa 7,446 ka mga tricycle driver ang nakadawat sa ilang P5,000 nga cash payout ning adlawa, Abril 15, isip kabahin sa dako nga programa sa pagpanghatag og tabang pinansyal alang sa kinatibuk-ang 11,261 ka mga benepisyaryo sa General Santos City.
Sumala sa Department of Social Welfare and Development Region 12, kini nga ayuda nagagikan sa direktiba ni Pangulong Ferdinand R. Marcos Jr. ug ipatuman sa maong ahensya isip suporta sa mga sektor nga naapektuhan sa kalisod sa panginabuhian.
Sa kasamtangan, 3,250 ka benepisyaryo ang padayon nga giserbisyuhan sa ongoing nga payout karong adlawa samtang nagpadayon ang distribusyon sa ayuda.
Gipahibalo usab sa DSWD-12 nga kadtong mga benepisyaryo nga wala pa nakadawat sa miaging mga adlaw adunay kahigayonan nga makuha gihapon ang ilang cash assistance karong adlawa, aron masiguro nga walay mabiyaan.
Gisiguro sa ahensya nga padayon nilang gipaayo ang sistema sa paghatag sa payout aron mas paspas, hapsay, ug siguradong makadawat ang tanang kwalipikadong benepisyaryo sa ilang ayuda.
