GENERAL SANTOS CITY – Gikabalak-an nga daghan sa kapin 100 nga missing nga mga residente sa Leyte nga naapektuhan sa pagdahili sa yuta gumikan sa bagyong Agaton ang patay na.
Matud pa ni Major Gen. Edgardo de Leon commander sa 8th ID Philippine Army nga sa aerial rapid assessment sa Baybay og sa Pilar, Leyte makit-an ang dako nga damyos.
Gikadugang pa niini daghang lapok nga nagtabon sa balay sa mga residente.
Luyo niini galaum ang mga rescuers nga may makit-an pa nga buhi gumikan sa miaiging adlaw may naluwas pa ang mga nasampit.
Ang grupo ni Gen. de Leon ang nagpahigayon og aerial rapid assessment sa Baybay og sa Pilar, Leyte. Sa Baybay ang Barangay Cantagnos ang labing naapektuhan og sa Pilar ang Abuyog.
Samtang daghang mga rescue team na ang miabot sa lugar aron mutabang sa search and rescue operation.
Gibutyag nga daghan ang kahoy sa bukid una ang panghitabo kung asa wala nakaya sa yuta ang gidaghanon sa ulan nga dala sa bagyong Agaton
Matud pa nga anaa sa usa hangtud sa duha ka kilometros ang gilay-on sa bukid sa residential area.
