GENSAN- Gipadayag ni Aldo Villarta, Bombo International Correspondent sa The Netherlands, nga nagdahom na sila og “bad news” o dili pabor nga resulta sa desisyon sa International Criminal Court Appeals Chamber.
Matod niya, andam na sila sa maong kapildihan ug nilihok na sila sa pag-recalibrate sa ilang pamaagi pinaagi sa pagpalapad sa ilang koneksyon ug network, dili lang sa kalsada kondili pinaagi sa mas organisadong paglihok.
Gihisgotan usab niya nga mas daghang Pilipino ang mitambong sa maong higayon aron ipakita ang ilang lig-ong baruganan batok sa ICC, ug gipahimangnoan niya nga ang Pilipinas usa ka soberanong nasod nga adunay naglihok ug kapasidad nga lokal nga hudikatura sa pagdumala sa maong mga kaso.
Bisan pa sa pormal nga pagbasura sa apela, mibarog gihapon ang ilang grupo nga kulang ang ebidensya batok sa kanhing presidente ug giisip kini nga hagit sa soberanya sa nasod.
Sa katapusan, gibalibaran sa International Criminal Court Appeals Chamber ang petisyon ni kanhing Pangulong Rodrigo Duterte kalabot sa hurisdiksyon sa kaso human nakita sa korte nga walay “error” sa interpretasyon sa Articles 12 ug 127 sa Rome Statute, hinungdan nga nagpadayon ang proseso sa kaso bisan pa sa mga pagsupak sa kampo sa kanhing lider.
