Mas gipalawman pa ang imbestigasyon sa mga otoridad human nakumpiska ang kapin sa P20 million nga kantidad sa illegal nga droga sa gipahigayong operasyon sa sakop sa Philippine Drug Enforcement Agency-7 kauban ang PNP Drug Enforcement Group 7 and Naval Forces Central, sa R. Rabaya Street, Barangay Cansojong, Talisay City, Cebu.
Nailhan ang suspetsado nga si alias “Ann”, 36-anyos usa ka flower shop owner, residente usab sa naasoyng lugar.
Nakuha atol sa operasyon ang tulo ka pakete nga gidudahang illegal nga droga nga anaa sa tulo ka kilo nga may street value nga anaa P20,400,000.
Lakip nakuha gikan sa maong suspek ang buy bust money, duha ka smartphones ug pipila ka mga IDs ug ATMs lakip na ang transaction notes.
Sa pagkakaron anaa na sa kustodiya sa PDEA 7 Regional Office Laboratory ang maong droga alang sa tukmang disposisyon.
