Nakadawat og ayuda ang kapin sa 400 ka pamilya nga naapektuhan sa linog sa Barangay San Jose, General Santos City pinaagi sa food packs nga gihatag sa City Government of Davao.
Gipangunahan ni Mayor Lorelie G. Pacquiao ang distribusyon sa mga food packs didto sa Barangay San Jose Gymnasium, diin dako ang pasalamat ug kalipay sa mga benepisyaryo nga nakadawat sa maong tabang.
Ang ayuda kabahin sa padayon nga paningkamot sa lokal nga panggamhanan sa Davao City sa pagtabang sa mga komunidad nga naapektuhan sa magnitude 7.8 nga linog nga mitay-og sa Mindanao.
Nagpasalamat usab ang lokal nga panggamhanan sa General Santos City sa Davao City Government tungod sa ilang pakighiusa ug paghatag og suporta sa mga pamilyang nagkinahanglan og tabang human sa kalamidad.
Sumala sa mga opisyal, nagpadayon ang koordinasyon tali sa mga lokal nga panggamhanan aron masiguro nga mahatagan og hustong suporta ang mga residente nga naapektuhan sa linog.
