GENERAL SANTOS CITY – Dako gayud ang pagbasol ni Alyas Toto, miyembro sa KAPA, sa gihimo niyang pagsulod ug pag-invest ug salapi sa naasoy’ng investment scam.
Kini human matud pa niya nabaligya ang iyang duha ka baka aron may ika-pay in.
Kagahapong adlawa, Huwebes, midangop sa Bombo Radyo GenSan ang naasoy’ng KAPA member aron magpatabang ug manawagan sa founder nga si Joel Apolinario nga dili na magtagu-tago inay atubangon ang iyang mga miyembro ug i-uli ang mga salapi nga gi-invest sa tawo bisan ang kapital na lang.
Sumala pa nga P70,000 ang iyang na-invest sa KAPA gikan sa halin sa iyang duha ka baka human ma-engganyo nga magpa-miyembro.
Abril 17 matud pa siya nag-pay in apan wala gayud naka-payout sukad.
Hinungdan nga kon dili matud pa mauli ang iyang kwarta, magpasang-at gayud siya ug kaso sa KAPA ug kang Apolinario.
Andam matud pa si Alyas Toto nga mutuman sa unsa mang himuon nga lakang sa gobyerno, basta mauli lang ang iyang salapi nga gi-invest.
Dungan niini nagpasalamat si Alyas Toto sa Bombo Radyo tungod may naduolan siya aron mapadayag ang iyang mga kalibog ug kabalaka tungod sa nahitabo sa iyang gi-invest nga salapi sa KAPA.
