Nagpasaka karon og urgent omnibus motion sa Office of the Ombudsman ang kampo ni Acting Davao City Mayor Sebastian “Baste” Duterte pinaagi sa iyang legal counsel nga si Atty. Israelito Torreon alas-10 sa buntag karong Setyembre 17, 2025.
Tumong sa maong urgent motion nga mapadali ang proseso sa pagtuki sa mga kasong gisang-at batok sa pipila ka mga opisyal sa gabinete, heneral sa pulisya, ug uban pang personalidad sa gobyerno.
Kahinumduman nga niadtong Lunes, Setyembre 15, 2025, gisang-at ni Mayor Duterte ang daghang kasong kriminal ug administratibo pinaagi ni Atty. Torreon sa Office of the Ombudsman–Mindanao.
Ang mga reklamo naglakip sa kidnapping, arbitrary detention, ug paglapas sa Anti-Torture Act, Anti-Graft and Corrupt Practices Act, ug uban pa, nga may kalabotan sa pag-aresto sa iyang amahan nga si kanhi Pangulong Rodrigo Roa Duterte niadtong Marso 11, 2025, subay sa warrant nga gipagula sa International Criminal Court (ICC).
