Gisuspendi og usa ka tuig sa Japan Boxing Commission (JBC) si Pinoy boxer John Riel Casimero.
Gipahamtang ang maong silot sa kanhi three-division champion human nga pakyas nga makab-ot niini ang sakto nga timbang sa away niya kang Saul Sanchez.
Sa maong panagsangka, aduna lamang limit nga 122-pound alang sa super bantamweight apan milapas og usa ka kilo ang timbang ni Casimero.
Isip proseso gihatagan kini og duha ka oras aron mawala ang sobra nga timbang apan walay nagbag-o.
Gibutyag ni Tsuyoshi Yasukochi ang JBC official nga subay sa ilang ruling, bawalan nga makaangkon ug away si Casimero sa Japan sulod sa usa ka tuig.
Kahinumduman nga sa maong away, gipatumba sa Pinoy boxer si Sanchez sa sulod lamang sa usa ka round.
Adunay record si Casimero nga 34 ka daog, upat ang pildi og usa ang draw nga adunay 23 knockouts.
