GENERAL SANTOS CITY – Gikatakdang magpahigayon ug infra audit ang lokal nga panggamhanan ning siyudad sa mga imprastraktura ug mga establisyimento gumikan sa mga nasinatiang mga linog.
Base kini sa girekomenda sa City Disaster Risk Reduction Management Office (CDRRMO) human ang natigayong pagkahugmak sa corner structure sa KCC Mall kagahapong adlawa, kung asa tulo ka traysikad ang nahagbungan sa mga debris.
Sa opisyal nga pagpaklaro sa management sa mall, mihuyang matud pa ang foam board insulation sa naasoy’ng bahin sa mall tungod sa nasinatiang mga linog sa nakalabay’ng adlaw, nga misamot tungod sa intensity 1 nga pagtay-og nga nasinatian kagahapon sa buntag, hinungdan nga mibigay na.
Hinuon, gipasalig sa management sa naasoy’ng mall nga balik sa normal ang ilang operasyon human sa insidente.
Gilayon usab nga nagpahigayon ug pag-inspeksyon ang taga-Office of Building Official (OBO) sa mall.
Samtang gumikan sa insidente, magpahigayon matud pa ug infra audit ang lokal nga panggamhanan tungod posible matud pang naapektuhan usab ang uban pang mga gambalay ug establisyimento sa siyudad gumikan sa nasinatiang mga linog sa nakalabay’ng mga adlaw.
