GENSAN- Giisip nga usa ka seryosong hulga sa sistema sa demokrasya ang nahitabong kagubot sa Senado niadtong miyerkules dungan sa isyu sa warrant of arrest batok kang Senador Bato dela Rosa.
Matod ni Attorney Arturo Cloma, “extremely urgent” nga mahatagan og katin-awan ang maong sitwasyon human makita ang giingong pagbaliwala sa mga otoridad sa prinsipyo sa separation of powers ug sa dignidad sa lehislatibong sanga sa gobyerno.
Gipasiugda sa abogado nga dako ang kakuwang sa legalidad sa maong warrant tungod kay wala kini gikan sa lokal nga korte sa Pilipinas, kundi gikan sa usa ka langyaw nga ahensya kansang gahum wala nasubay sa Konstitusyon nasud.
Gihangyo karon ang gobyerno nga paabuton una ang dinalian nga interpretasyon sa Supreme Court mahitungod sa hurisdiksyon sa International Criminal Court (ICC) sa dili pa mopatuman og bisan unsang aksyon.
Tumong niini nga malikayan ang dugang kagubot ug ang nagkagrabe nga pagkabahin-bahin sa katawhang Pilipino sa pagkakaron.
Sa karon, nagpabilin ang hugot nga pagbantay sa publiko sa mamahimong sunod nga lakang sa korte suprema bahin niining sensitibong isyu sa nasod
