Ipadayon ang imbestigasyon sa Senado sa war on drugs sa Duterte Administration mutambong man o dili si kanhi Pangulong Rodrigo Duterte, sumala kang Senate Minority Leader Koko Pimentel III.
Nakatakda karong adlawa, Oktubre 28, 2024 ang pagdungog sa Senate Blue Ribbon Committee.
Matud sa senador, mukapin sa 30 ang ilang giimbitahan sa pagdungog ug daghan ang mubiyahe aron muapil sa hearing.
Matud niini nga dili ma postpone ang pagdungog sa war on drugs tungod sa kawad-on sa presensya sa usa ka tawo.
Aminado si Pimentel nga importante nga madunggan ang testimonya ni Duterte apan dili niini kontrolado ang lihok sa kanhi punong ehekutibo hilabi pa nga layo kini sa Maynila.
Una nang gibutyag ni Senador Ronald “Bato” dela Rosa nga mutambong si Duterte sa pagdungog sa Senado kalabut sa war on drugs. Plano usab ni Pimentel nga tapuson ang imbestigasyon una mahuman ang Disyembre.
