GENERAL SANTOS CITY – Anaa na sa 115 ang nagpositibo sa HIV Treatment Hub sa DR. JORGE P. Royeca Hospital Enero hangtud Oktubre ning kasamtangang tuig, kung itandi sa 144 HIV case niadtong tuig 2021.
Kahibaluan nga anaa sa DOH 12 ang kinatibuk-ang datus sa HIV cases sa dakbayan.
Maka-alarma na gyud ang kaso sa HIV sa dakbayan gumikan nagkabata ang mga nagapositibo rason nga kinahanglan gyud nga mas pakusgan ang kampanya batok HIV ug mas tutukan ang sektor sa mga kabataan.
Sagad matud pa sa mga positibo sa HIV sa Gensan anaa sa edad 15 anyos ngadto na 34 anyos kung asa usa sa mga nakita nila nga rason mao ang sobra nga exposure sa social media o dili sakto nga paggamit niini.
Gawas sa personal nga pagbisita sa mga HIV Treatment Center, gina-promote na usab karon sa gobyerno ang self-testing sa HIV kung asa adunay ginahatag nga testing kits ga pwedeng himuon lang sa balay.
