Miingon ang International Criminal Court (ICC) Registry nga padayon nilang gimonitor ang kondisyon ug mga lihok ni kanhi Presidente Rodrigo Duterte samtang siya gibilanggo sa The Hague tungod sa iyang edad ug pipila ka mga sakit
Sa pito ka panid nga dokumento nga gipetsahan Mayo 20, ang ICC Registry miingon nga si Duterte giisip nga usa ka detenido nga adunay taas nga risgo nga matumba, apan wala’y natala nga bisan unsang insidente sa pagkatumba sa miaging 30 ka adlaw.
Wala usab gihatag sa ICC ang mga detalye bahin sa iyang mga sakit tungod sa confidentiality sa medical records.
Sumala sa ICC Registry, sa talagsaon nga mga okasyon nga giingong mawad-an siya sa iyang balanse, siya gitabangan dayon sa mga kawani sa detensyon ug gisusi sa usa ka medical team.
Gihimo usab ang mga pagbag-o sa iyang selda ug mga lawak sa pagbisita aron mahimong mas luwas ug mas komportable ang iyang mga lihok.
Gidugang sa ICC nga si Duterte nagpadayon sa pagdawat og medikal nga pag-atiman samtang siya gibilanggo kalabot sa ‘crimes against humanity’ nga may kalabotan war on drugs sa dihang siya ang mayor sa Davao City ug sa ulahi nahimong presidente sa Pilipinas
