Gipalig-on karon sa General Santos City Police Office (GSCPO) ang kampanya sa road safety education aron mapakunhod ang nagpadayon nga taas nga ihap sa mga vehicular accidents sa syudad.
Matud ni Acting City Director P/Col. Ariel Acala, kasagaran sa mga aksidente sa dalan resulta sa human error, maong mas gipunting karon sa kapulisan ang pag-edukar sa mga motorista kabahin sa husto nga pagsunod sa traffic rules ug responsableng pagdrayb.
Giingon ni Acala nga padayon nilang pahinumdoman ang mga drayber sa paglikay sa overspeeding, pagrespeto sa traffic signs, ug paghatag og prayoridad sa kaluwasan sa tanang naggamit sa dalan.
Lakip sa gipalig-on sa GSCPO ang information dissemination ug road safety awareness campaigns aron masabtan sa publiko ang ilang responsibilidad isip mga motorista ug makatampo sa pagpamenos sa mga aksidente.
Gipasabot sa opisyal nga dili lamang pagpatuman sa balaod ang tumong sa GSCPO, kondili ang pagpugong sa mga aksidente pinaagi sa edukasyon ug lig-on nga pakigtambayayong sa komunidad.
