GENSAN-Nagpahigayon og protesta ang grupong Sentro sa buhatan sa Department of Labor and Employment (DOLE) sa General Santos City aron ipanawagan ang pagpataas sa sweldo sa mga mamumuo.
Sumala ni Rashed Borja, Sentro Leader, kinahanglan nga manguna ang DOLE sa pagduso sa wage increase aron mapatuman ang dugang sweldo alang sa mga trabahante. Matud niya, gamay ra kaayo ang gisugyot nga P85 nga wage increase kumpara sa ilang gipangayo nga P200, ilabina tungod sa padayon nga pagsaka sa presyo sa mga nangunang panginahanglanon sama sa pagkaon, kuryente, ug gasolina.
Gipahayag ni Borja nga bisan pa man ipatuman ang P85 nga dugang suhol, dili pa gihapon kini igo aron mabawi ang kakulang sa kita sa mga mamumuo tungod sa taas nga gasto sa panginabuhi.
Gipangayo usab sa Sentro ang pagtangtang sa Regional Tripartite Wages and Productivity Board (RTWPB) ug ipailalom sa national level ang pagtakda sa minimum wage aron mahimong patas ang pagtaas sa sweldo sa tanang rehiyon.
Matud ni Borja, dili mohunong ang ilang grupo sa pagpangayo og gitawag nilang makabuhing sweldo ug hustong benepisyo alang sa mga wage earner tungod kay ang mga trabahante maoy dakong bahin sa nagpalihok sa ekonomiya sa nasod.
Gipangayo usab sa grupo nga maaplikar sa Region 12 ang sama nga wage increase nga gihatag sa National Capital Region (NCR), diin giingong kapin tulo ka milyon ka empleyado ang naapektuhan sa dugang sweldo.
Samtang, si Shiela Marie Dumalay, DOLE Field Officer sa General Santos City, mipasalig nga ipadangat nila sa ilang Regional Office ug Central Office ang mga kabalaka ug panawagan sa mga trabahante, lakip ang ilang suhestyon kabahin sa RTWPB ug dugang konsultasyon uban sa mga labor group.
Gipasabot ni Dumalay nga ang DOLE GenSan dili maoy adunay katungod sa pagdesisyon sa wage policy, apan ilang ipasa ang mga hangyo sa mga mamumuo ngadto sa mas taas nga opisina alang sa hustong aksyon.
