Wala pa makatuo ug wala pa usab naga-“sink in” kang Angle Jean Bagacay ang pagkahimong topnotcher sa May 2026 Certified Public Accountant Licensure Examination.
Ang maong topnotcher nga gikan sa General Santos City ug estudyante sa Mindanao State University miingon nga dako kaayo ang iyang kalipay human matuman ang dugay na niyang gipangandoy nga makasulod sa listahan sa mga topnotchers sa CPA board exam.
Matud ni Bagacay, wala niya damha nga maabot niya ang maong kalampusan apan bunga kini sa walay hunong nga pagpaningkamot, pag-ampo ug suporta sa iyang pamilya, mga higala ug mga magtutudlo.
Nalipay usab siya nga kauban niyang nakahatag og dungog sa ilang unibersidad si Ace Benhur M. Ligo nga nahimong topnotcher usab sa maong eksaminasyon.
Giingon niini nga ang ilang kalampusan dili lamang para sa ilang kaugalingon kondili alang usab sa ilang eskwelahan ug sa mga estudyanteng nagdamgo nga mahimong certified public accountant sa umaabot.
Dugang pa ni Bagacay, ang ilang nahimo nagpamatuod nga pinaagi sa determinasyon ug paningkamot posible nga makab-ot ang bisan unsang damgo bisan pa sa mga kalisod nga giatubang atol sa ilang pag-eskwela ug pag-review alang sa board examination.
