Giduso sa Office of the Civil Defense (OCD)-12 ang kanunayng pagpahigayon og earthquake drills sa tanang eskwelahan sa rehiyon aron maandam ang mga estudyante ug mga magtutudlo sa higayon nga adunay kusog nga linog.
Sa pamahayag ni OCD-12 Regional Director Rodrigo Sosmeña, miingon siya nga importante nga dili lamang kabisado sa mga magtutudlo, estudyante ug mga empleyado sa gobyerno ang “Duck, Cover and Hold,” kondili kinahanglan usab nga nahibal-an nila ang pinakaluwas nga evacuation route ug ang gitakdang open space nga adtoan human sa pagtay-og.
Gibutyag ni Sosmeña nga ang regular nga earthquake drills makatabang sa pagpalig-on sa kahibalo ug disiplina sa publiko, ilabina sa kabataan, aron malikayan ang kalibog ug panic sa panahon sa emerhensiya.
Ang maong panawagan gisundan sa sunod-sunod nga mga linog nga nasinati sa pipila ka mga lugar sa miaging mga adlaw, hinungdan nga gipalig-on sa OCD-12 ang kampanya sa disaster preparedness sa tibuok rehiyon.
