Karong adlawa, ginasaulog sa tibuok kalibutan ang Earth Hour 2026 nga adunay worldwide theme nga “Green Innovation – Green Future,” samtang sa Pilipinas kini gipunting sa “Switch On Habits for Earth!” usa ka panawagan sa pagbag-o sa atong adlaw-adlaw nga batasan alang sa kalikupan.
Ang Earth Hour usa ka global nga kalihokan nga giorganisar sa World Wildlife Fund o WWF nga nagsugod pa niadtong 2007 sa Sydney, Australia. Gikan sa simpleng pagpalong sa suga, kini karon nahimong simbolo sa panaghiusa sa tibuok kalibutan batok sa climate change.
Karong adlawa, giawhag ang publiko nga palongon ang dili kinahanglanon nga suga ug gamit nga de-kuryente sulod sa usa ka oras, gikan alas 8:30 hangtod 9:30 sa gabii isip suporta sa pagpanalipod sa planeta.
Samtang nagapadayon ang kalihokan, gipasidan-an usab sa mga eksperto ang nagkagrabeng krisis sa klima ug enerhiya sama sa pagtaas sa temperatura, kakulang sa kahinguhaan, ug pagtaas sa konsumo sa kuryente ug gasolina.
Sa General Santos City, giawhag sa CENRO ang aktibong partisipasyon sa publiko. Sumala kang Allan Marcilla, dako ang papel sa matag usa sa pagpanalipod sa kalikupan.
Ang Earth Hour usa ka pahinumdom nga bisan simple nga pagpalong sa suga, mahimong dako ang epekto kon magtinabangay ang kalibutan.
