Giangkon sa lokal nga panggamhanan sa Quezon City nga dako nga hagit alang kanila ang maabot, ug labi na ang malabwan, ang malampusong pag-host sa Agusan del Sur sa Palarong Pambansa 2026.
Sa pakighinabi sa Bombo Radyo kang Mayor Joy Belmonte, gihulagway niya nga “amazing” ang tibuok pagdumala sa maong kalihokan sa probinsya, gikan sa pagpangandam hangtod sa pagtapos sa palaro, nga halos wala siyay ikatandi.
Opisyal nang gikumpirma sa Department of Education nga ang Quezon City maoy mahimong host sa Palarong Pambansa 2027, ang ika-67 nga edisyon sa nasudnong palaro.
Ikaduha na kini nga higayon nga mahimong host ang Quezon City human sa una nilang pagdumala niadtong 1966, ug gilauman nga ipahigayon kini sa Mayo 2027.
Ang ceremonial turnover gihimo niadtong Mayo 31, 2026 sa Prosperidad, dungan sa pagsirado sa palaro, nga gitambongan nila ni DepEd Secretary Sonny Angara ug Undersecretary Malcolm Garma.
Matod pa ni Belmonte, dako kini nga oportunidad alang sa Quezon City aron ipakita pag-usab ang kapasidad sa NCR sa pagdumala og usa ka nasudnong sporting event.
Posibleng gamiton ang mga dagkong pasilidad sama sa University of the Philippines Diliman, Amoranto Sports Complex, QC M.I.C.E. Center ug uban pang pampublikong eskwelahan sa siyudad. Gipasabot usab sa mayor nga ang Quezon City usa ka “gateway” nga konektado sa nagkadaiyang bahin sa nasod, busa usa kini ka angay nga lugar alang sa panagtapok sa liboan ka mga batan-ong atleta.
Bisan pa niini, giangkon sa QC government nga taas ang sukdanan nga gitakda sa Agusan del Sur. Kapin sa 13,000 ka student-athletes gikan sa 20 ka delegasyon ang miapil sa Palarong Pambansa 2026, ug gidayeg sa DepEd ug uban pang stakeholders ang maayong logistics, venues ug pag-atiman sa probinsya.
Alang sa Quezon City, ang mga hagit naglakip sa mas urbanisadong kahimtang sama sa mas grabe nga trapiko, mas taas nga panginahanglan sa accommodation ug mas taas nga gilauman sa publiko.
Bisan pa niini, masaligon si Belmonte nga pinaagi sa tabang sa DepEd, Philippine Sports Commission, Department of the Interior and Local Government ug mga pribadong kaabag, makahatag ang Quezon City og organisado ug makahuluganon nga pag-host sa Palarong Pambansa 2027.
Sumala kaniya, tumong nila ang paghatag og “champion’s experience” alang sa tanang atleta ug delegado, ug nanawagan siya sa mga residente sa siyudad nga suportahan ang hosting aron mahimong malampuson ang pagbalik sa Palaro sa NCR.
