Gidayeg sa mga netizen ang duha ka delivery boy sa tubig mainom sa galon kay wala sila magduha-duha sa pagtabang sa pagpawong sa nagdilaab nga traysikol sa Pateros Manila. Sa video usa ka traysikol ang mihunong sa tunga sa dalan sa Barangay Martirez del 96 sa Pateros, diin gi-kickstart sa drayber sa makadaghang higayon aron muandar.
Apan pagkataud-taud, kalit lang misilaob ang traysikol ug maayo nalang mikanaog dayon ang drayber ug ang iyang pasahero.
Sa pipila lang ka segundos, halos gilamoy sa kalayo ang tibuok traysikol.
Hangtod nga niabot ang duha ka delivery nga nagbitbit ug mga sudlanan o galon nga tubig mainom nga ihatod.
Diha-diha nanganaog ang duha ka delivery boy nga nagdalag tubig aron ibubo sa nagdilaab nga traysikol.
Miabot usab ang usa ka residente nga nagdala og usa ka balde nga tubig aron ibubo usab sa sakyanan.
Hangtod nga niabot ang barangay administrator nga nagdalag fire extinguisher ug hingpit nga napalong ang kalayo.
Gidayeg sa mga netizen ang kabayanihan sa mga residente sa pagpalong sa nagdilaab nga traysikol, ilabi na sa gihimo sa duha ka delivery boy nga walay pag duha-duha.
