Padayong nangayo og aksyon si Cherryl B. Alam, residente sa Purok 9, Barangay Tinagacan, tungod sa problema sa pag-awas ug pagtagas sa tubig sa ilang propiedad nga dugay na nilang giatubang.
Matud niya, pipila na ka higayon silang nag-atubang sa barangay uban ang kapitan ug si Engr. Loid Flores, apan wala’y pormal nga dokumento sa ilang mga kasabotan bahin sa pag-ayo sa pader ug pagpalapad sa agianan sa tubig.
Samtang, nagreklamo usab si Chelsie Valles bahin sa baho ug pag-agas sa tubig nga giingong gikan sa usa ka poultry farm. Matud niya, pila na ka tuig nga giantos sa mga residente ang maong problema.
Giingong nakaabot ang tubig sa pipila ka pribadong propiedad ug nakaapekto sa ilang mga pananum sama sa mais, lubi ug saging.
Gikabalak-an ni Valles nga mas daghang tanom ug binuhing hayop ang mahimong maapektuhan kung magpadayon ang pag-awas sa maong tubig.
Nanawagan ang mga residente sa mga hingtungdan nga susihon ang maong problema ug hatagan dayon og tukmang aksyon..
