GENSAN- Personal nga gibisita ni DPWH Secretary Vince Dizon, ang kalsada nga apektado sa landslide sa Sitio El Dulog, Barangay Ned, Lake Sebu, South Cotabato.
Gibutyag ni Dizon nga gimando na ni Pangulong Ferdinand Marcos Jr. ang paspas nga pag-ayo sa nahagsa nga Surallah-Lake Sebu-Maitum Road partikular diin pinaka-apektado ang dalan nga sakop sa Sitio El Dulog, Barangay Ned, Lake Sebu, South Cotabato aron nga masiguro nga luwas ug paspas ang biyahe sa mga residente sa lugar human kining nag-landslide niadtong nakalabayng semana.
Sumala sa kalihim nga duha ang pabalik-balik nga gisulti sa Pangulo, una mao ang paspas nga paghimo ug aksyon tungod kinabuhi sa mga residente ang apektado.
Ikaduha mao ang pagmintina ug angay nga maayo ang kalsada sa lugar para sa mga residente. Usa sa mga pasiunang plano ang paghimo ug 6 kilometers nga diversion road sa lugar aron nga likayan ang nag-colapse nga area.
Paningkamutan sa DPWH nga karong tuiga, mahuman ang maong diversion road para magamit na sa mga motorista.
