Gipadayag sa Department of the Interior and Local Government (DILG) nga mangayo kini og permiso gikan sa International Criminal Court (ICC) aron mapangayuan og panumpa si kanhi Presidente Rodrigo Duterte isip mayor sa Davao City samtang siya anaa pa sa kustodiya sa The Hague, Netherlands.
Matod ni Interior Secretary Jonvic Remulla, ilaha nang giila ang kadaugan ni Duterte sa bag-o lang nahuman nga Midterm elections ug siya opisyal nga giproklama sa Commission on Elections usa ka adlaw human sa piniliay.
Gisulti sa kalihim nga mangayo siya og permiso sa ICC aron tugutan ang usa ka konsul sa Pilipinas nga maoy mopanumpa kang Duterte.
Dili man gud mahimong molingkod sa puwesto si Duterte isip mayor kung wala pa siya kapapanumpa.
Tungod niini, samtang anaa pa siya sa kustodiya sa ICC, ang Vice Mayor sa Davao City nga si Sebastian Duterte usa ang molingkod isip acting mayor.
Nahinumduman nga si Duterte kasamtangang anaa sa kustodiya sa ICC sa The Hague, Netherlands samtang nag-atubang og kaso nga crimes against humanity tungod sa iyang maduguong kampanya batok sa droga sa panahon sa iyang pagkapresidente.
