Gipasiugda sa Department of Education (DepEd) kaniadtong Domingo ang panginahanglan sa pagsugod sa pagtudlo sa mga kahanas sa pagbasa ug pagsulat sa mga estudyante sa sayo nga edad, subay sa mga resulta sa 2024 Functional Literacy, Education, and Mass Media Survey (FLEMMS) nga nagpadayag nga kapin sa 18 milyon nga mga gradwado sa junior high school ang gikonsiderar nga functionally illiterate o adunay ubos nga pagsabot sa mga subject.
Matod ni DepEd Assistant Secretary Jerome Buenviaje, ang sayo nga pagtutok sa literacy, gikan sa Kindergarten hangtod sa Grade 3, importante aron mapugngan ang mga estudyante nga maglisod sa pag-apas sa sunod nga mga grado.
Dugang pa niya nga dili igo ang gihimo sa DepEd tungod kay apektado usab kini sa ubang mga hinungdan sama sa malnutrisyon.
Sugod 2023, gipatuman ang giusab nga K-10 curriculum, nga nakapamenos sa mga katakos sa pagkat-on ug 70% ug naghatag ug gibug-aton sa mga kahanas sa pundasyon sa Kinder ngadto sa Grade 3 sama sa literacy, numeracy, ug socio-emotional development.
Samtang si Education Secretary Sonny Angara, namahayag nga ang DepEd dili motugot sa bisan kinsang estudyante nga mabiyaan sa pagbasa ug pagsabot, ug gipasalig ang padayon nga pagtutok sa departamento sa pagpasiugda sa functional literacy alang sa tanan.
Samtang, gisaway ni Senador Loren Legarda ang datos sa FLEMMS, nga matud niya nagpakita sa sistematikong mga kakulangan sa edukasyon.
Sa bag-ong mga sumbanan sa PSA alang sa 2024 FLEMMS, ang kahulugan sa functional literacy nahimong mas estrikto, nga nanginahanglan ug abilidad sa pagbasa, pagsulat, pagkalkulo, ug pagsabut – ang hinungdan sa mas taas nga gidaghanon sa mga dili makapasar.
Matod pa ni Legarda, ang krisis sa literasiya dili lang problema sa eskwelahan kondili hulga usab sa kaugmaon sa nasud.
