Nanawagan si Gensan Schools Division Superintendent Isagani Dela Cruz sa mga ginikanan sa mga estudyante nga makigtambayayong sa kapulisan kalabutan sa nagkalap nga bahad sa social media batok sa SPED-San Isidro ug Buayan National High School.
Matud ni Dela Cruz, importante ang papel sa mga ginikanan sa pagmonitor sa kahimtang ug lihok sa ilang mga anak, ilabi na kung adunay makita nga kahina-hinalang pamatasan o kalihokan.
Apan iyang gipahimangnoan ang mga ginikanan nga dili magpadala sa emosyon ug dili mohimo og kaugalingong aksyon o mahimong vigilante.
Iyang gidasig ang publiko nga ireport dayon ngadto sa mga awtoridad ang bisan unsang impormasyon aron kini maimbestigahan sa kapulisan ug makahimo og tukmang lakang.
Gipasiugda ni Dela Cruz nga pinaagi sa kooperasyon sa mga ginikanan, eskwelahan, komunidad, ug PNP masiguro ang kaluwasan sa mga estudyante ug malikayan ang posibleng hulga sulod sa mga eskwelahan.
