Adunay bag-ong lakang ang Department of Education o DepEd aron mas maandam ang mga eskwelahan sa pag-atubang sa posibleng active attack incidents.
Pinaagi sa usa ka memorandum, gimando sa DepEd ang simultaneous school safety drill sa mga eskwelahan sa tibuok nasud aron mahanas ang mga magtutudlo, estudyante ug school personnel sa hustong pagtubag kung adunay hulga sa seguridad.
Lakip sa gihatagan og importansya ang emergency protocols, koordinasyon tali sa school personnel ug mga otoridad, ug pagpalambo sa awareness sa school community.
Sa General Santos City, misunod niini ang pipila ka mga eskwelahan pinaagi sa pagpahigayon og mga orientation ug awareness activities.
Sa Mabuhay Elementary School, gihisgutan atol sa School Symposium on Active Shooting and Other Deadly Weapon Emergency Awareness ang mga angay buhaton sa mga estudyante kon adunay insidente nga naglambigit og armas.
Mitambong isip resource persons ang SWAT Team Leader nga si PSSg Rowil D. Lumbab ug Patrol Woman Bai Sittie Alma A. Tukan.
Sa Romana C. Acharon Integrated School, gipahigayon usab ang Active Attack o Active Shooter Awareness Orientation alang sa school community.
Tumong sa mga maong kalihokan nga mas masabtan sa mga estudyante ug school personnel ang mga angay nga lakang aron maprotektahan ang ilang kaugalingon ug malikayan ang dugang peligro panahon sa emergency.
