Gisiguro sa Department of Education (DepEd) General Santos City nga luwas ang mga building sa mga pampublikong eskwelahan human sa magnitude 7.8 nga linog nga miigo sa dakong bahin sa Mindanao niadtong Hunyo 8, 2026.
Sumala kang Dr. Isagani Dela Cruz, Schools Division Superintendent sa DepEd General Santos City, padayon pa ang detalyadong inspeksyon sa mga pasilidad sa eskwelahan aron masiguro nga wala kini madaot sa kusog nga paglinog ug sa sunod-sunod nga mga aftershocks.
Matud niya, gilauman nga mahuman sa mga engineers ang tanang inspeksyon karong Byernes tungod kay gisundan dayon ang M7.8 nga linog sa daghang kusog nga mga aftershocks nga nakapalisod sa paspas nga pag-assess sa kahimtang sa mga building.
Gipasiugda usab ni Dela Cruz ang kamahinungdanon sa pagbalik sa normal nga operasyon sa mga eskwelahan aron dili na molungtad ang kahadlok ug trauma nga nasinati sa mga estudyante tungod sa maong kalamidad.
