GENSAN – Nagpahimangno si Lieutenant Junior Grade Gideon Dulnuan, spokesperson sa Coast Guard District Southern Mindanao, sa tanang mananagat ug mga mag-layag sa kadagatan sa rehiyon bahin sa kamahinungdanon sa pag-amping ug istriktong pagsunod sa mga safety measures aron malikayan ang mga disgrasya sa dagat.
Sumala kang Dulnuan, bisan walay gi-isyu nga weather advisory ang PAGASA, dili pasabot nga luwas gyud ang kahimtang sa dagat.
Adunay mga higayon nga mukalit lang mag-usab ang weather patterns ug molig-on ang mga sea currents, nga mahimong hinungdan sa kusog nga balud o ‘rough seas’.
Kini naghatag ug dakong risgo ilabi na sa gagmayng fishing boats ug light crafts.
Tungod niini, gitambagan sa Coast Guard ang tanang vessel operators ug mananagat nga mag-exercise og ‘maximum caution’ kung magplano sa paglayag.
Kinahanglan nga magpahigayon una og husto ug sakto nga weather assessment sa dili pa mosugod sa biyahe.
Matud pa ni Dulnuan, kon makita nga maut ang panahon og dili maayo ang kahimtang sa balud, mas maayong mopauli na dayon ug dili na ipadayon ang paglayag aron mapanalipdan ang kinabuhi ug malikayan ang pagkaunlod sa sakayan.
