Dili na luwas gamtiton ang Barangay Hall sa Brgy. Apopong ning dakbayan human kini grabeng madaot tungod sa kusog nga linog niadtong Hunyo 8 2026. Matud ni Kapitan Paolo Natividad nga human sa linog, gipahimo nila og inspeksyon ang bilding pinaagi sa duha ka pribadong structural engineers ug nakit-an nga delikado na kining okupahan. Gikumpirma usab kini sa City Engineer’s Office nga mipahigayon og kaugalingong assessment ug nagbutang og red tag sa maong barangay hall.
Sumala ni Kapitan Natividad, posibleng idekompiska o ide-molisyon na ang bilding alang sa kaluwasan sa mga residente ug aron malikayan ang posibleng aksidente.
Nagpaabot pa ang barangay sa pormal nga findings gikan sa City Engineer’s Office ug mga pribadong engineers nga gamiton isip suporta sa ilang mga dokumento ngadto sa Commission on Audit ug uban pang ahensya alang sa proseso sa posibleng pagdemolis ug pagtukod og bag-ong barangay hall.
Samtang, gipadayon sa barangay ang ilang serbisyo pinaagi sa temporaryong opisina aron dili maantala ang pagserbisyo sa katawhan.
