Hilabihan ang kalipay sa lokal nga kagamhanan sa Malay, Aklan sa nadawat nga re-recognition sa isla sa Boracay isip ‘World’s Leading Luxury Island Destination sa World Travel Awards Grand Final Gala Ceremony ‘nga gipahigayon sa Savoy Palace, Madeira, Portugal.
Ang makasaysayanong pag-ila nagsunod sa kanhing kalampusan niini isip ‘Asia’s Leading Luxury Island Destination sa Asia and Oceania Gala Ceremony sa City of Dreams’, Manila kaniadtong Septiyembre 3, 2024.
Nalabwan sa Boracay ang mga iladong nominado sama sa Jersey, Mustique, St. Vincent and the Grenadines, ug The Bahamas dugang nga nagpabaskog sa posisyon niini isip usa ka nag-unang destinasyon alang sa mga luxury travelers sa tibuok kalibutan.
Samtang, positibo gihapon ang LGU nga maabot ang target nga tourist arrival nga 2.1 milyon sa dili pa matapos ang kasamtangang tuig
Gani natala ang ubos nga pag-abot sa mga turista sa niaging mga buwan apan wala gihapon sila mawad-an ug paglaom nga maabot ang maong gidaghanon.
Matod ni Kathrine Licerio, tigpamaba sa Malay Tourism Office nga hangtod sa Nobiyembre 28, nakatala ang ilang buhatan og 1,870,069 ka tourist arrivals diin gikinahanglan ang kapin sa 230,000 ka turista aron markahan ang target nga 2.1 milyones sa katapusan sa tuig.
Aron maabot ang nasangpit nga gidaghanon, mokabat sa pito ka libo ka mga turista ang gikinahanglan nga mobisita sa Boracay matag adlaw ug positibo sila nga mahitabo kini karong Disyembre panahon sa Pasko.
