Padayon nga gipalig-on sa Bureau of Fire Protection (BFP)-Alabel ang kampanya sa fire safety bisan pa sa pagsugod sa ting-ulan. Sumala kang FO2 Glen Percy Tulio, dili angay isipon sa publiko nga ubos na ang risgo sa sunog tungod lamang kay sige’g ulan.
Matod niya, kasagaran sa mga sunog nagagikan gihapon sa depektibong electrical wiring, overloaded nga mga outlet, ug walay pag-amping sa paggamit sa mga electrical appliances, nga mahimong hinungdan sa sunog bisan pa sa mabasa nga panahon.
Ang pahimangno sa BFP misunod human usa ka panimalay ang hingpit nga nalamoy sa kalayo sa Alabel. Bisan walay naitalang nasamdan, nagbilin kini og dakong kadaot sa kabtangan.
Busa, gihangyo sa BFP ang matag panimalay nga regular nga susihon ang ilang electrical connections, likayan ang overloading sa mga saksakan, ug andamon ang pamilya sa husto nga pamaagi sa paglikay ug pagtubag sa sunog aron malikayan ang susamang insidente sa umaabot.
