Daghan ang nagtimbaya sa Filipina celebrity nga si BB Gandanghari human kini makagradwar isip summa cum laude sa kurso nga Bachelor of Science in Entertainment Business sa University of California.
Gianunsyo ni BB ang maayong balita pinaagi sa iyang social media account kung asa gi-upload ang video sa graduation ceremony nga puno sa kalipay ug garbo.
Sa usa ka mubo nga mensahe, iyang gipakita ang pagpaningkamot niya isip usa ka working student.
“Being summa cum laude is not without hard work, discipline, perseverance and determination,” matud pa ni BB. “Proud sab ko nga working student ko nga adunay perfect attendance ug wala gyud ko na-late sa tibuok kurso.”
Gawas sa Latin honors, giila usab si BB Gandanghari isip Student of the Month ug usa sa mga miyembro sa Honor Society of Los Angeles, nga timaan sa iyang akademikong kalampusan.
Matud pa niya, misulod siya sa film school aron sundon ang iyang damgo nga mahimong producer ug director.
Sa wala pa kini magtuon sa Amerika, alumna si BB sa St. Louis University sa Baguio, diin nakahuman siya og degree sa Economics, una pa siya misulod sa showbiz kapin 40 ka tuig ang milabay.
Ang iyang kalampusan usa ka inspirasyon sa daghang Pilipino nga bisan sa edad, panahon, ug kahimtang, walay sayo ni ulahi sa pagtuman sa pangandoy.
