Gibatikos ang bangkong Banco Bilbao Vizcaya Argentaria (BBVA) sa Mexico human kini mopugos nga personal nga moadto sa ilang branch ang usa ka 96-anyos nga lola nga ‘bedridden’ o dili na makalihok samtang anaa sa iyang gihigdaan, aron lang makumpirma ang iyang identity ug ma-release ang iyang pension.
Bisan pa sa mga reklamo, mitubag ang bangko nga ilaha lang gisunod ang ilang mga protocol alang sa identity verification.
Apan daghan ang nanawagan nga usbon o i-review ang mga palisiya aron mas mahimong tawhanon.
Sa video nga gi-upload sa FB account, makita nga ang tigulang nga si Fidelia Vásquez Nuño gidala sa branch sa bangko samtang anaa sa ambulance stretcher.
Dili na makalihok ang nahisgutan tungod sa katigulang ug daghan na usab kini og mga balatian.
Bisan pa sa paningkamot sa pamilya niya nga isumite ngadto sa bangko ang tanang dokumento nga gikinahanglan aron ma-verify ang identity sa lola, gipugos gihapon sa bangko nga personal nga moanhi sa branch ang lola aron tarungon ang glitch sa biometric registration niini.
Tungod sa maong biometric glitch, unom ka bulan na nga wala makadawat og pension si Lola Fidelia.
Daghang netizens ang misaway ug mitawag sa pamunuan sa bangko nga walay kasingkasing ug nakalapas sa katungod sa usa ka tigulang.
Tungod niini, nagpasaka na og pormal nga reklamo ang pamilya ni Lola Fidelia batok sa bangko.
