Usa ka gamer nga taga-Japan ang nakabreak og world record human magduwa og Super Mario sulod sa kapin duha ka adlaw.
Si Audrey Mina nakapahimutang sa rekord alang sa pinakataas nga videogame marathon sa Super Mario series, nga miabot og 60 ka oras, 17 minutos ug 58 segundos, sumala sa Guinness World Records.
Gihimo niya ang maong rekord sa Chiyoda, Tokyo gikan Mayo 2 hangtod Mayo 5, 2025, diin nagpadayon siya og duwa nga halos walay hunong.
Ang maong marathon gi-live stream ni Mina sa iyang YouTube channel, diin liboan ka fans ang nagtan-aw ug naghatag og suporta pinaagi sa comments aron mapadasig siya sa iyang pagpadayon.
Nalabwan niini ang miaging rekord nga 50 ka oras nga gihuptan ni Dan Ryckert sukad 2011.
Sumala sa mga lagda sa Guinness, gitugotan ang mga partisipante og lima ka minutos nga pahulay matag usa ka oras nga duwa, apan kinahanglan gihapon nga magpadayon ang dula aron ma-aprubahan ang rekord.
Kini nga kalampusan nagpakita sa padayon nga kasikat sa Super Mario ug sa dedikasyon sa mga gamer sa tibuok kalibutan.
