Wala motungha si suspended Bamban, Tarlac Mayor Alice Guo sa hearing sa Senate committee on women kalabot sa operasyon sa Philippine Offshore Gaming Operators (POGO).
Ang opisyal nga lista sa bisita nga gipresentar sa panel sa Senado nag-ingon nga si Guo wala motambong sa pagdungog.
Ang panel sa Senado wala nihatag ug detalye kung unsay hinungdan sa paglikay niini sa pagdungog.
Nasayran nga nalambigit sa kontrobersiya si Guo human mabulgar ang relasyon niini sa Zun Yuan Technology Inc. — ang ilegal nga Pogo hub sa Bamban, Tarlac.
Sa makadaghang higayon, gipanghimakak ni Guo ang tanang mga akusasyon batok kaniya, lakip ang pagtudlo nga siya usa ka Chinese nga espiya.
Una, gipaubos sa Office of the Ombudsman si Guo og ‘six-month preventive suspension without pay’ tungod sa iyang relasyon sa POGO ug sa pagkuwestiyon sa iyang citizenship.
Gipasakaan usab kini sa Department of Justice og non-bailable offense nga qualified human trafficking tungod sa relasyon niini sa illegal POGO.
