Atensyon sa mga adunay binuhi nga iro!
Sa New Zealand, nahimong agaw atensyon ang kaso sa usa ka iro nga si Nuggi nga na-rescue gikan sa iyang tag-iya sa Auckland kaniadtong Oktubre 2021.
Sa dihang nakaabot kini sa pag-atiman sa Royal New Zealand Society for the Prevention of Cruelty to Animals, mitimbang na kini og 53.7 kilos og dili na gyud madala sa tiil niini ang kabug-aton sa iyang lawas.
Sumala sa mga nag-rescue sa iro, bisan nga dyes metros lang ang kalayuon sa iyang ginalakat, tulo ka higayon gyud nga nagapundo si Nuggi tungod dili siya makaginhawa.
Tungod sa hilabihan katambok sa iyang lawas, dili na halos ma-detect sa mga doctor ang iyang heartbeat gawas pa gyud sa gibati nga conjunctivitis.
Adunay mga samad usab kini sa tiyan tungod ginatuohan nga nagaduot ang kini nga parte sa iyang lawas sa yuta tungod dili na gani kini makahulag.
Nakahibalo ba ka kung ngano?
Base sa imbestigasyon, ginahatagan kini sa tag-iya og walo hangtod napulo ka parte sa manok matag adlaw og aduna pa gyud doggy biscuits.
Wala gyud hunahunaa sa tag-iya nga halos ginapatay na niini ang iro tungod sa iyang pagpakaon sa iro.
Duha ka bulan pa ang gitinir sa iro sa pag-atiman sa rescue group kun asa miabot sa 8.9 kilos ang gikunhod sa iyang timbang, apan sa ulahi, napatay ang iro tungod sa hemorrhage.
Base sa necropsy, nakasinati ang iro og komplikasyon sa panglawas lakip na ang liver disease.
Gikasuhan ang tag-iya tungod sa overfeeding og niining semana lamang, nagdesisyon na ang Manukau District Court nga pabayron kini og $720, gidumilian nga manag-iya og iro sa sulod sa usa ka tuig og gisentensyahan usab kini og duha ka bulan nga pagkapreso.
Pinasahi usab kini nga kaso sa New Zealand tungod kalabanan nga malnourished animals ang ilang ma-rescue, apan nagpahimangno usab ang organisasyon nga makamatay gihapon og usa ka sala ang overfeeding sa mga manananap.
